شنو هو GEO وشلون يقرر الذكاء الاصطناعي منو يذكر
الناس صارت تسأل الذكاء الاصطناعي قبل كوكل. هاي المقالة تشرح شلون يختار منو يذكر بإجاباته، وشنو تسوي حتى تكون أنت الجواب.
في هذه الصفحة
شنو هو GEO وشلون يقرر الذكاء الاصطناعي منو يذكر
بالمقالة اللي فاتت شرحت شلون طلع موقعي أول نتيجة بكوكل.
وگتلك الجزء الجاي راح يكون عن الذكاء الاصطناعي: شلون يختار مواقع يذكرها بإجاباته.
هذا هو.
أول شي: ليش تهتم؟
طريقة بحث الناس دا تتغير.
هواي ناس صاروا يسألون ChatGPT أو أي أداة ذكاء اصطناعي قبل ما يفتحون كوكل.
يكتب الواحد سؤاله، وياخذ جواب واحد جاهز. ماكو صفحة نتائج، ماكو عشر روابط يختار منها.
وهنا الفرق الكبير:
- بكوكل، حتى لو أنت بالنتيجة الثالثة أو الرابعة، بعدك موجود وممكن يوصلك زائر.
- بجواب الذكاء الاصطناعي، إذا ما انذكرت، أنت مو موجود.
والمجال بعده جديد. قليل اللي يشتغل بيه هسه. اللي يسبق، يكسب.
شنو هو GEO؟
GEO يعني Generative Engine Optimization.
مجال جديد، فكرته: شلون تخلي الذكاء الاصطناعي يفهم شركتك ومعلوماتك، حتى يگدر يذكرك بإجاباته.
SEO يشتغل حتى تطلع بنتائج كوكل.
GEO يشتغل حتى تنذكر بجواب الذكاء الاصطناعي.
والاثنين يكملون بعض. أغلب اللي يفيد SEO يفيد GEO. بس GEO مو مجرد SEO باسم ثاني، أكو شغلات مختلفة راح أشرحها وحدة وحدة.
وهاي مو نظرية
دخلت بهذا المجال من أول أيامه.
آخر شركة اشتغلت وياها جان عدها موقع قديم.
تسأل أي أداة ذكاء اصطناعي عن مجالها، ما تلگيها. ولا بأي منصة.
ما جان عدها أي فرصة تنذكر.
بنيتلها موقع جديد، وطبقت بيه كل اللي راح تقراه بهاي المقالة.
هسه تطلع النتيجة الأولى بـ ChatGPT، وتقريباً بكل أدوات الذكاء الاصطناعي.
بأسئلة متنوعة، مكتوبة مثل ما يكتبها زبون حقيقي، مو سؤال واحد محفوظ.
وهذا بمجال منافسته كلش عالية.
نفس الشركة اللي حچيت عنها بالمقالة الأولى. نفس الموقع. الشغل الصح يشتغل بالبحث وبالذكاء الاصطناعي سوة.
شلون يقرر الذكاء الاصطناعي منو يذكر؟
قبل الشغل العملي، أكو قاعدة وحدة.
الذكاء الاصطناعي ما يعرفك. يقرا مواقع، يجمع معلومات، ويذكر اللي فهمه وتأكد منه.
يعني ثلاث شروط:
نص مكتوب واضح، مو صور وملفات PDF
الذكاء الاصطناعي يقرا نص.
أسعارك داخل صورة مصممة؟ ما يشوفها.
خدماتك بملف PDF؟ أغلب الأحيان ما توصله.
كل معلومة تريده يذكرها، لازم تكون نص مكتوب بصفحة من موقعك. مو صورة، مو تصميم، مو ملف.
حقائق محددة يگدر يتأكد منها، مو شعارات
"الأفضل بالمنطقة" و"جودة عالية وأسعار منافسة" ما تنفع. هاي ما يگدر يتأكد منها، وما يذكرها.
اللي ينفع:
- من أي سنة تشتغل
- شنو خدماتك بالضبط، وحدة وحدة
- أسعارك، أو من وين تبدي
- وين مكانك، وأي مناطق تغطي
- شنو يميزك، بشي يگدر الواحد يتأكد منه
الذكاء الاصطناعي يذكر الحقائق اللي يگدر يعيدها بثقة. الشعارات يهملها.
نفس الاسم بكل مكان
إذا اسمك بموقعك بشكل، وبانستغرام بشكل ثاني، وبخرائط كوكل بشكل ثالث، الذكاء الاصطناعي ما يتأكد انو هاي كلها نفس الجهة.
يتردد. واللي يتردد بيه، ما يذكره.
ثبت اسم واحد، بنفس الكتابة بالضبط، بموقعك وحساباتك وكل مكان تنذكر بيه.
الشغل العملي: شنو يفرق GEO عن SEO
كلشي شرحته بالمقالة الأولى يظل مطلوب: SSR، والـ sitemap، والـ robots.txt، والعناوين. هاي الأساس.
زيادة عليها، هاي الشغلات الخاصة بالـ GEO:
1. طريقة كتابة المحتوى
الذكاء الاصطناعي لمن يجاوب، ياخذ الجملة اللي تجاوب السؤال مباشرة.
يعني اكتب بهاي الطريقة:
- كل فقرة تجاوب سؤال واحد.
- الجواب المباشر بأول سطر أو سطرين، والتفاصيل بعده.
- عناوين فرعية بصيغة السؤال اللي يكتبه الناس.
- جمل قصيرة. الجملة الطويلة اللي بيها خمس أفكار ما تنقتبس.
إذا جوابك مدفون بنص فقرة طويلة، الذكاء الاصطناعي ياخذ الجواب من موقع ثاني كاتبه أوضح.
2. الأسئلة والأجوبة بالموقع
حط بصفحاتك قسم أسئلة وأجوبة حقيقي.
أسئلة بنفس الصيغة اللي يكتبها الزبون، وجواب مباشر لكل وحدة.
ليش هاي قوية بالـ GEO؟ لأن هاي بالضبط طريقة اشتغال الذكاء الاصطناعي: واحد يسأل، وهو يجاوب. لمن يلگي بصفحتك نفس السؤال وجوابه، الاقتباس يصير سهل.
وادعمها بـ FAQPage بالـ JSON-LD حتى تنقرا كبيانات، مو بس كنص.
3. البيانات المنظمة JSON-LD
شرحتها بالمقالة الأولى للـ SEO، ونفسها تشتغل للـ GEO.
كود مخفي بالصفحة يگل للروبوت شنو نوع الصفحة ومنو صاحبها:
OrganizationأوPersonحتى يعرف منو أنت بالضبطServiceلكل خدمة تقدمهاFAQPageللأسئلة والأجوبةArticleلكل مقالة
هاي تعطي الذكاء الاصطناعي معلوماتك بصيغة ما تنغلط: اسم، وصف، روابط، كلها منظمة.
4. تحديث المحتوى
الذكاء الاصطناعي يفضل المصادر الحديثة.
صفحة آخر تحديث إلها من سنتين، تجي صفحة منشورة هذا الشهر وتغلبها.
يعني:
- راجع صفحاتك الرئيسية وحدثها بين فترة وفترة.
- خلي تواريخ التحديث صحيحة بالـ sitemap.
- انشر بانتظام. مدونة تكتب بيها كل أسبوع أو أسبوعين تخلي موقعك كله يبين حي.
5. ملف llms.txt
هذا أجدد شي بالقائمة، وراح أشرحه زين لأن قليل اللي يعرفه.
ملف نصي بسيط تحطه بجذر موقعك، يوصل من رابط مثل:
yoursite.com/llms.txt
مثل ما robots.txt موجه لروبوتات محركات البحث، llms.txt موجه لأدوات الذكاء الاصطناعي.
شنو يكون بيه؟ نص بصيغة Markdown:
- سطر يعرف موقعك: منو أنت وشنو تسوي.
- قائمة بأهم صفحاتك، كل وحدة برابطها ووصف سطر واحد.
ليش يفيد؟ لأن أداة الذكاء الاصطناعي لمن تقرا موقعك، عدها وقت وحجم محدود. هذا الملف يعطيها الخلاصة والروابط المهمة بمكان واحد، بدل ما تلف بالموقع وتخمن.
وبصراحة: هذا معيار جديد، مو كل الأدوات تستخدمه هسه. بس كتابته سهلة، وضرره صفر، وموقعي بيه واحد من أول يوم.
ملاحظة أخيرة: لا تمنع روبوتات الذكاء الاصطناعي
أكو مواقع تمنع روبوتات الذكاء الاصطناعي بالـ robots.txt أو من إعدادات الاستضافة، وأصحابها ما يدرون.
إذا الروبوت ممنوع يقرا موقعك، ماكو GEO أصلاً.
تأكد انو ملفك ما يمنعها.
عندك موقع؟
أگدر أشتغل عليه، حسب حالته:
- أعيد شغل الـ SEO ماله من الأساس.
- أعيد تصميمه.
- أضيفله أقسام وصفحات حتى يظهر أكثر بالذكاء الاصطناعي وبالبحث.
ماعندك موقع؟
أبنيلك واحد من الصفر.
وكل اللي قريته بهاي المقالة، والمقالة اللي قبلها، يكون مبني بيه من أول يوم.