شلون طلع موقعي أول نتيجة بكوكل
ماكو سر واحد. أكو أشياء تسويها صح من البداية، وهاي كلها بالتفصيل: الستاك، الاستضافة، الملفات، والكلمات.
في هذه الصفحة
شلون طلع موقعي أول نتيجة بكوكل
سويت موقعي الجديد.
لمن تدور على المصطلح اللي أستخدمه كعنوان، موقعي يطلع أول واحد.
وحتى ملخص الذكاء الاصطناعي ياخذ التعريف من موقعي ويحچي عليه.
هسه راح أگلك شلون صار هذا، بالتفصيل.
أول شي: ليش تهتم أصلاً؟
- أغلب الناس ما تنزل للصفحة الثانية أبداً.
- أول نتيجة تاخذ أغلب الضغطات. الباقي يتقاسمون اللي يبقى.
- ما تدفع على كل ضغطة مثل الإعلانات. تشتغل مرة، وتضل تجيب.
هذا الفرق بين موقع يشتغل لك، وموقع كاعد بس.
وهاي مو حالة وحدة
آخر شركة اشتغلت وياها جان عدها موقع.
بس ما تظهر بكوكل أبداً.
بنيتلها موقع جديد. وبأقل من شهر بدت تنافس وتظهر بأول النتائج.
حتى وية منافسين أقدم منها وأكبر.
1. الستاك: ليش Next.js مو React لوحده
React لوحده يبني الصفحة بجهاز الزائر.
يعني روبوت كوكل يوصل، يلگي صفحة فارغة، والمحتوى ما وصل بعد.
Next.js يسوي SSR، يعني Server Side Rendering: الصفحة تتجهز بالسيرفر وتوصل جاهزة.
الروبوت يلگي نص مكتوب من أول ثانية.
هذا لوحده يفرق بين موقع يظهر وموقع ينهمل.
2. الاستضافة: سيرفر مو ملفات ثابتة
هواي ناس يحطون موقعهم على استضافة تخزن ملفات بس.
هاي ما تگدر تسوي SSR، لأن ماكو سيرفر يشتغل ويجهز الصفحة.
استخدم Vercel أو Railway.
هذول يشغلون كود بالسيرفر، فالصفحة تجهز قبل لا يوصلها الزائر أو الروبوت.
3. الملفات اللي لازم تكون بموقعك
هاي ملفات ما يشوفها الزائر، بس محركات البحث تدور عليها أول شي.
robots.txt
يگل للروبوت: شنو تگدر تدخله، وشنو اتركه.
إذا غلطان، تگدر تمنع كوكل من موقعك كله بلا ما تدري.
sitemap.xml
خريطة بيها كل صفحات موقعك وتاريخ آخر تحديث لكل وحدة.
بدونها الروبوت لازم يلگي صفحاتك بنفسه. وياخذ وقت، وأحياناً ما يلگيها.
JSON-LD
هذا الأهم، وأغلب المواقع بالعراق ماعندها.
كود مخفي بالصفحة يگل للروبوت شنو نوع هاي الصفحة بلغة يفهمها:
Personبصفحة التعريف بيكArticleبكل مقالة بالمدونةBreadcrumbListحتى يفهم ترتيب صفحاتكFAQPageإذا عندك أسئلة وأجوبةLocalBusinessإذا عندك محل أو مكتب بمدينة
بدون JSON-LD، الروبوت يخمن نوع صفحتك. ولمن يخمن، يغلط.
4. الأجزاء المخفية بكل صفحة
هاي تنكتب بالكود وما تظهر للزائر، بس هي اللي تطلع بنتيجة البحث:
title— العنوان اللي يظهر بكوكل. خله واضح وفيه الكلمة اللي يدور عليها الناس.meta description— السطرين تحت العنوان. هذول يقررون إذا الواحد يضغط لو لا.canonical— يگل لكوكل هاي هي الصفحة الأصلية، حتى ما ينحسب عندك محتوى مكرر.Open Graph— الصورة والعنوان اللي يطلعون لمن تنشر الرابط بواتساب أو فيسبوك.altللصور — الروبوت ما يشوف الصورة، يقرا الوصف بس.H1واحد بكل صفحة — عنوان رئيسي واحد، مو عشرة.
5. الكلمات الصح بالمدونة
الزبون يكتب سؤاله بلغته هو، مو بمصطلحات.
قبل ما تكتب أي مقالة، فكر: شنو الجملة اللي راح يكتبها بكوكل؟
بعدين حط هاي الجملة بالأماكن اللي تفرق:
- بعنوان المقالة
- بأول فقرة، مو بالنص
- بوحدة من العناوين الفرعية
- برابط الصفحة نفسه
ولا تعيدها عشر مرات. كوكل يعرف الحشو ويعاقب عليه.
اكتب صفحة تجاوب سؤال واحد جواب كامل، أحسن من عشر صفحات تلف حوله.
6. السرعة
موقع يفتح بعد 10 ثواني يخسر الزائر قبل ما يشوف شي.
وكوكل يشوف هذا ويحسبه عليك.
اضغط صورك، ولا تحمّل مكتبات ما تستخدمها، وخلي الصفحة تجي جاهزة من السيرفر.
عندك موقع؟
خليني أفحصه.
راح أگلك شنو ينقصه بالضبط، وشنو يمنعه من الظهور.
ماعندك موقع؟
أبنيلك واحد من الصفر، مبني صح من أول يوم.
مو موقع يقعد بلا فايدة، موقع يطلع بالنتائج ويجيبلك ناس.
الجزء الثاني
بالمقالة الجاية راح نحچي عن الذكاء الاصطناعي.
شلون يختار مواقع يذكرها بإجاباته، وشنو الملفات والأشياء اللي تخلي موقعك واحد منها.
هذا مجال جديد، وقليل اللي يشتغل بيه هسه. اللي يسبق، يكسب.